МДО — УПДББУ — «Мөхәммәдия» мәдрәсәсе ҮДО ТР МДН

  • Мөхәммәдия мәдрәсәсе — Баш бит
Чыгарылыш кичәсе
Табигатьтә ял

Яңалыклар һәм белдерүләр

05.12.2017

Беренчелек бездә!

Әссәлемү гәләйкүм кәдерле дин кәрдәшләр!

Атна буе яңалыкларда мәдрәсә шәкертләренең җиңуләрен күзәтеп бардыгыз.

Бүген ярышларының нәтиҗәсе мәглүм булды. Мәдрәсәбезнең шәкертләре гомумикоманда зачетында беренчелекне яуладылар!

Шәкертләребез тырыш һәм максатчан. Алар спорт белән дус, шундый авырлыклар алдында югалып калмауларын янә исбатладылар!

Аллага шөкер!

04.10.2017

"Мөхәммәдия" мәдрәсәсе кызлар футбол командасы җыя!

Игътибар! "Мөхәммәдия" мәдрәсәсе кызлар футбол командасы җыя!

Мөселманнар арасында спорт белән шөгыльләнүне популярлаштыру һәм төрле ВУЗлар арасындагы ярышларда мәдрәсәбез данын яклау максатыннан Казан шәһәренең урта профессиональ дини белем бирү учреждениесе — «Мөхәммәдия» мәдрәсәсендә укыган һәм хәзерге вакытта укучы ханымнар һәм туташлардан футбол командасына керү өчен гаризалар кабул ителә! Көндезге, кичке һәм хәтта читтән торып укучы хатын-кыз шәкертләребез дә команда составына керергә хокуклы (бер генә шарт белән: атнасына 1-2 мәртәбә тренировкаларга йөрү сорала).

Моның өчен түбәндәге гугл-форманы гына тутырырга кирәк:
https://goo.gl/forms/oS6NYdzsH9CBKAPD3

Ихтирам белән, "Мөхәммәдия" мәдрәсәсе җитәкчелеге.

28.09.2017

V Халыкара форум.

Болгар ислам академиясендә мөселман мәгариф оешмалары мөгаллимнәренең V Халыкара форумының икенче көне узды.

Мөхәммәдия мөгаллимнәре шулай ук форумда катнаштылар.

Форум ислам уку йортларында мәгариф өлкәсенә караган проблемаларны хәл итү өчен мәйданчык булачак.

Катнашучылар урта һәм югары һөнәри мөселман мәгариф оешмалары эшчәнлеге турында фикер алышачак. Форум кысаларында иң яхшы студентларга стипендияләр тапшырылачак, шулай ук яхшы эшләүче мөгаллимнәр билгеләнәчәк.

Мөселман мәгариф оешмалары мөгаллимнәре форумы 2012 елдан башлап һәр елны уздырыла.

20.09.2017

Ачык дәрес “Экстремизмга – юк!”

Бүген “Мөхәммәдия” Казан югары мөселман мәдрәсәсендә радикализмга каршы тору буенча ачык дәрес үтте. Шәкертләргә ялган идеяләрдән сакланырга кирәклек турында лекцияләрне мөгаллимнәр укыды.

Чыгыш ясаучылар арасында – мәдрәсә директоры урынбасарлары Наил хәзрәт Яруллин, Зөлфәт хәзрәт Габдуллин, мәдрәсә мөгаллиме Мәлик хәзрәт Ибраһимов.

Ачык дәрес мәдрәсә мөгаллиме Мәлик хәзрәт Ибраһимовның кереш сүзе белән башланды.Ул студентларга ислам диненең тыныч, имин тормышка һәм рухи сыйфатларга өндәве турында әйтте.

Мәдрәсә мөдире урынбасары Наил хәзрәт Яруллин чыгышында илебездә тыелган группировкаларга тукталды һәм студентларны “алардан ерак булырга, аларның китапларын укымаска һәм аларның юлыннан бармаска” чакырды. Ул шәкертләрне ИГИЛның (Россиядә тыелган террорчылык оешмасының) ислам диненә катнашы булмавы турында кисәтте.

Лекциядә студентларга шулай ук үз-үзеңне тоту кагыйдәләре һәм тышкы кыяфәткә игътибар бирү турында да искә төшерделәр.

Зөлфәт хәзрәт:

-Тышкы кыяфәт читкә этәрергә түгел, ә киресенчә сезнең белән әңгәмә алып баруга җәлеп итеп торырга тиеш.

Ачык дәрес “Мөхәммәдия” мәдрәсәсенең беренче курс шәкертләренә студент билетлары тапшыру белән төгәлләнде.

07.12.2016

Шәкертләр арасында Мәүлид аена багышланган бәйге башланды.

Бу бәйге мәдрәсәдә икенче тапкыр уздырыла. Укучылар Пәйгамбәребезнең (с.г.в.) шәҗәрәсен матур һәм иҗади якын килеп ясадылар. Бөтен эшләрдән күргәзмә оештырылды.

Җиңүчене сайлар өчен, лаеклы дип тапкан эш файдасына барлык шәкертләр үз тавышларын бирә алалар. Нәтиҗәләр Мәүлид кичәсендә игълан ителәчәк. Иң уңышлы эшләрнең авторларын бүләкләр көтә.

01.12.2016

Мәүлид ае мөбарәк булсын!

Мәүлид бәйрәме

Мәүлид ислам динен кыйммәтләгән, зурлаган кичәләрнең берсе. Чөнки бу кичәдә бөтен кешелек дөньясына соңгы пәйгамбәр буларак җибәрелгән Мөхәммәд салләлаһү гәләйһи вә сәлләм дөньяга килгән. Пәйгамбәребезнең туган вакыты миляди исәпнең 571 елына туры килә, рәбигыләүвәл аеның 11-12нче көннәре арасындагы кичә дип исәпләнелә.

Сөекле Пәйгамбәребез кешеләрнең иң юмарты, иң күркәм холыклысы, иң сабыры һәм иң мәгърифәтлесе булган. Ул кешелек дөньясына Коръән нурын, ислам әхлагын җиткергән. Аллаһы Тәгалә Изге китапны Пәйгамбәребезгә иңдереп, аны олылаган һәм болай дип боерган: “(Ий Мөхәммәд!) Кешеләргә Аллаһның юмартлыгы вә рәхмәте илә иңдерелгән Коръән белән сөйлә һәм аларны Коръән белән гамәл кылырга өндә!” (“Юныс”сүрәсе, 58 аять).

Пәйгамбәребез салләлаһү гәләйһи вә сәлләмнең игелекле үгет-нәсихәтләре, хәдисләре Раббыбыз кушканча яшәргә, мәрхәмәтле булырга өйрәтә, туры юлдан барырга ярдәм итә. Аллаһы Тәгаләнең Мөхәммәд Пәйгамбәрне (с.г.в) Рәсүл итеп җибәрүе — безгә күрсәткән бик зур рәхим-шәфкате.

Аллаһның Рәсүле бар галәмгә рәхмәт буларак җибәрелгән. Коръәндә “Әнбия” сүрәсенең 107нче аятендә бу хакта: “(Ий, Мөхәммәд!) Без сине бары тик рәхмәт билгесе итеп галәмдәге халыкларга күндердек”, — дип әйтелә.

Мәүлид — Аллаһ Рәсүле дөньяга килүгә ихлас күңелдән шатлануны белдерә торган вакыт. Бу кичәдә сәдакаләр бирү, догалар кылу, салаватлар әйтү саваплы гамәлләрдән санала. “Мәүлидне олылаган һәр кеше ислам диненең җанлануына ярдәм итә”, – дип әйткән дин белгечләре.

Барчабызга да Аллаһы Сөбхәнәһү вә Тәгаләнең рәхим-шәфкате насыйп булсын! Өммәтебезгә Пәйгамбәребез салләлаһү гәләйһи вә сәлләмнең сөннәтенә ияргән хәлдә яшәргә язсын иде! Амин.

01.12.2016

Мәдрәсәбездә Мәүлид кичәсе уздырылачак

Чараның уздырылу вакыты әле төгәл билгеләнмәгән, якынча декабрьнең икенче яртысында булыр дип көтелә. Шәкертләр әлеге мөһим вакыйгага бик теләп һәм тырышып әзерләнәләр.
Барлык шәкертләрне һәм остазларны бәйрәмдә көтеп калабыз!

25.11.2016

Спартакиадада «Мөхәммәдия» командасы беренче урын алды!

Спартакиадада җинү

Спартакиадада мини футбол, өстәл теннисы, воллейбол, җиңел атлетика ярышлары уздырылды.

Ярышлар 21—24 ноябрь көннәрендә үткәрелде.

Безнекеләр өстәл теннисы һәм воллейбол буенча беренче урынны, җиңел атлетика буенча — икенче, ә мини-футбол буенча җиденче урынны алдылар. Һәм гомуми нәтиҗәдә «Мөхәммәдия» мәдрәсәсе командасы беренче урынга лаек булды.

21.11.2016

Мәдрәсәнең яңа тулайторак бинасы ачылды.

Зәңгәр мәчет янындагы әлеге бинага кызлар күченде. Егетләр элеккеге тулайторакларына кире кайттылар.

20.10.2016

Ноябрь аенда дини уку йортлары шәкертләренең спартакиадасы уздырылачак.

Әлеге чара Казанда ел саен үткәрелеп килә. Анда шәкертләр төрле спорт ярышларында көч сынашачак.

Өскә